Papa: Kisha shpall Ungjillin. Nëse dikush më kritikon, ta bëjë këtë me të vërtetën

Papa Leoni XIV në Castel Gandolfo u përgjigjet pyetjeve të gazetarëve dhe komenton deklaratat e fundit kritike të presidentit të SHBA-së, Trump: “Kisha prej vitesh ka folur kundër të gjitha armëve bërthamore. Shpresoj të dëgjohem për vlerën e fjalës së Zotit”

Para se të kthehej në Romë nga Castel Gandolfo, të martën në mbrëmje, Papa Leoni XIV foli shkurt me gazetarët dhe iu përgjigj komenteve të fundit kritike të bëra ndaj tij nga Presidenti i SHBA-së, Donald Trump.

“Misioni i Kishës është të shpallë Ungjillin, të predikojë paqen,” tha Ati i Shenjtë. “Nëse dikush dëshiron të më kritikojë për shpalljen e Ungjillit, le ta bëjë këtë me të vërtetën”. Duke folur jashtë rezidencës papnore në Castel Gandolfo, Leoni XIV kujtoi se Kisha ka folur vazhdimisht kundër armëve bërthamore.

“Prej vitesh, Kisha ka folur kundër të gjitha armëve bërthamore, kështu që nuk ka asnjë dyshim për këtë çështje”, tha Papa, duke iu përgjigjur pretendimit të Presidentit Trump se Papa e konsideron të pranueshme që Irani të zotërojë armë bërthamore, duke vënë kështu të gjithë katolikët në rrezik.

“Unë thjesht shpresoj të dëgjohem për shkak të vlerës së fjalës së Zotit”, theksoi Papa Leoni XIV, duke përsëritur se ai ka folur qartë “që nga momenti i parë kur u zgjodha, dhe tani jemi afër përvjetorit. Thashë: ‘Paqja qoftë me ju’”.

Sa i përket takimit të tij me Sekretarin amerikan të Shtetit, Marco Rubio, të planifikuar për të enjten, më 7 maj, Papa shprehu shpresën se do të jetë “një dialog i mirë”, “me besim dhe hapje”, në mënyrë që “të kuptohemi mirë me njëri-tjetrin”.

“Mendoj se çështjet për të cilat ai po vjen nuk janë çështje të sotme. Do të shohim”, shtoi Papa Leoni, duke iu referuar sërish komenteve të bëra nga Presidenti i SHBA-së.

Burimi: R.SH. / Vatikan