Novosellë: u bekua altari në nder të të Lumit Don Shtjefën Kurti, në përvjetorin e themelimit të famullisë

Më 20 tetor 2026, Famullia e Shën Rrokut në Novosellë shënoi 104 vjet nga themelimi i saj. Me këtë rast, u kremtua Mesha e Shenjtë dhe u bekua altari në nder të të Lumit Don Shtjefën Kurti, meshtar dhe martir, jeta dhe shërbimi i të cilit janë të lidhura drejtpërdrejt me historinë e kësaj famullie.

Kremtimit eukaristik i priu Ipeshkvi ynë, Shkëlqesia e Tij, Imzot Dodë Gjergji, në bashkëkremtim me famullitarin, Don Ndue Ballabani, dhe meshtarë të tjerë të Dioqezës. Besimtarë të shumtë morën pjesë në Meshën e Shenjtë, të bashkuar me barinjtë e tyre në lutje dhe në falënderim ndaj Hyjit për jetën e kësaj bashkësie gjatë më shumë se një shekulli.

Bekimi i altarit ka një domethënie të veçantë për Novosellën, ku Don Shtjefën Kurti u emërua famullitar në vitin 1924. Nderimi i tij si i Lum e afron bashkësinë me dëshminë e një meshtari që i ka shërbyer kësaj famullie dhe që e jetoi thirrjen meshtarake me përgjegjësi ndaj besimtarëve dhe popullit të vet.

Shërbimi i tij baritor përfshiu edhe mbrojtjen e të drejtave të shqiptarëve në rrethanat e rënda të kohës. Më 5 maj 1930, së bashku me Don Gjon Bisakun dhe Don Luigj Gashin, i drejtoi Lidhjes së Kombeve një promemorie mbi gjendjen e shqiptarëve në Jugosllavi. Ky dokument solli në vëmendjen ndërkombëtare vuajtjet e tyre dhe mbetet dëshmi e angazhimit të këtyre meshtarëve për dinjitetin dhe të drejtat e popullit të tyre.

Don Shtjefën Kurti i qëndroi besnik shërbesës meshtarake edhe gjatë përndjekjes komuniste në Shqipëri. U pushkatua më 20 tetor 1971, duke e dëshmuar deri në vdekje besnikërinë ndaj Krishtit dhe Kishës. Më 5 nëntor 2016, në Shkodër, u shpall i Lum së bashku me martirët e tjerë shqiptarë. Bekimi i altarit në Novosellë përkoi kështu me 55 vjetorin e martirizimit të tij.

Nderimi i martirëve e drejton jetën e besimtarëve te Krishti, prej të cilit ata morën forcën për të qëndruar besnikë. Në qendër të jetës së Kishës është Eukaristia, ku flijimi i vetëm i Krishtit në kryq bëhet i pranishëm në mënyrë sakramentale dhe bashkësia ushqehet në tryezën e Zotit. Këtu merr kuptim edhe dëshmia e martirit, i cili, i bashkuar me Krishtin, ia kushton Hyjit jetën e vet.

Përvjetori i themelimit të Famullisë së Shën Rrokut është rast mirënjohjeje për meshtarët dhe brezat e besimtarëve që kanë mbajtur gjallë jetën e saj fetare. Kjo trashëgimi i besohet sot bashkësisë famullitare, që ta vazhdojë nëpërmjet pjesëmarrjes në sakramente, edukimit të fëmijëve në fe dhe kujdesit për njerëzit në nevojë. Shembulli i të Lumit Don Shtjefën Kurti mbetet një thirrje për ta jetuar me përgjegjësi këtë detyrë të krishterë.