Imzot Dodë Gjergji kremtoi Sakramentin e Krezmimit në Bishtazhin

Më 17 maj 2026, në Famullinë “Zoja Rruzare” në Bishtazhin, u kremtua Sakramenti i Krezmimit gjatë Meshës së Shenjtë të udhëhequr nga Imzot Dodë Gjergji. Në këtë kremtim solemn morën pjesë shumë besimtarë, familjarë dhe të afërm të kandidatëve për Krezmim.

Të rinjtë dhe të rejat e famullisë pranuan Sakramentin e Përforcimit dhe u forcuan me dhuntitë e Shpirtit Shenjt. Sakramenti i Krezmimit është një hap i rëndësishëm në jetën e të rinjve, sepse i ndihmon të jetojnë fenë me vetëdije dhe përgjegjësi. Përmes këtij sakramenti, ata thirren të jenë dëshmitarë të Krishtit dhe të Ungjillit në jetën e tyre të përditshme.

Në predikimin e tij, Imzot Dodë Gjergji theksoi rëndësinë e jetës së lutjes dhe të lidhjes së vazhdueshme me Krishtin. Ai i inkurajoi të rinjtë që të mos kenë frikë të jetojnë dhe të dëshmojnë fenë e tyre në shoqërinë e sotme. Famullitari Don Lush Sopi falënderoi Ipeshkvin për praninë dhe kujdesin e tij atëror. Ai falënderoi gjithashtu prindërit, kumbarët për mbështetjen dhe përgatitjen e kandidatëve për këtë kremtim të rëndësishëm. Në fund të Meshës së Shenjtë, besimtarët u bashkuan në lutje dhe gëzim për të rinjtë e famullisë.